Liverpooli dhe Villarreali do ta zhvillojnë sonte përballjen e parë të tyre në gjysmëfinale të Ligës së Kampionëve. “Reds” shihen si favoritë në këtë sfidë, por që “Nëndetësja e Verdhë” nuk bën të nënvlerësohet asnjëherë, mbi të gjitha pasi i eliminoi Juventusin dhe Bayernin

Liverpooli dhe Villarreali do ta zhvillojnë sonte duelin e parë gjysmëfinal të tyre në Ligën e Kampionëve.

Gjiganti anglez dhe mrekullia spanjolle do ta kërkojnë një biletë për në finalen e madhe të kësaj gare.

“Reds” shihen si favoritë në sfidën e sontme, e cila do të luhet në “Anfield Road”, shkruan “Gazeta Express”.

Të drejtuar nga Mohamed Salah, anglezët do të mundohen ta krijojnë një kapital sa më të lartë para ndeshjes së kthimit.

Trajneri Jurgen Klopp këtë sfidë e ka quajtur si speciale, ndërsa ka kërkuar nga lojtarët e tij që të mos e nënvlerësojnë kundërshtarin.

E kur jemi tek “Nëndetësja e Verdhë”, ajo këtë sezon i ka fundosur gjigantët si Juventus dhe Bayern.

Andaj, spanjollët do të mundohen ta vazhdojnë këtë rrugëtim përrallor.

Trajneri Unai Emery e ka pranuar se Villarrealit i nevojitet një paraqitje perfektë për ta mposhtur Liverpoolin në Angli, shkruan “Gazeta Express”.

Ekipi i Verdhë e synon një rezultat të favorshëm para ndeshjes së kthimit, të cilën do ta luajë në shtëpi pas një jave.

Ndeshja ndërmjet Liverpoolit dhe Villarrealit do të luhet sonte, duke filluar nga ora 21:00. /Gazeta Express/